púha kellan er þreytt....

Hæ og gleðileg jól allir saman. Já ég er búin að bralla alveg ótrúlega mikið síðustu 17 daga eða svo. Er meðal annars búin að fara til þriggja landa, geri aðrir betur. Var einmitt að koma heim fyrir 3 klst síðan úr 14 tíma rútuferðalagi frá Sviss afar hressandi eins og þið getið ímyndað ykkur. Ég ætla að skrifa e-d meira seinna og segja frá Spáni, Íslandi og Sviss :) Hafið það best...ælta að lúlla smá
luvBerglind

Vandpolo, rafmagnslaus og ferðalag

fórum í Vandpolo í gær, fengum að hafa svona sundhúfur eins og alvöru pró, en vá hvað þetta er erfitt, halda sér uppi, grípa, kasta og einhver að ýta í mann allan tímann, púff. En þetta var stórskemmtilegt að prufa, þó ég ætli nú ekki að leggja þetta sport fyrir mig, enda er ég ferleg get ekki fengið smá vatn framan í mig án þess að þurfa að þurrka það burt með höndunum og það gengur nú ekki alveg nema ég mætti hafa sundgleraugu þá kannski hugsa ég mig um!!!

Dagurinn í dag er búinn að vera ferlegt vesen, bíllinn tók uppá því að verða rafmagnslaus og það í Århus. Ég dró ekki meira né minna en 7 manns með mér í vesenið, kæmi mér ekki á óvart ef skúladætur og makar þeirra sendi mér ekki jólakort í ár hehe :) Niii þau voru frábær hjálpuðu mér þvílíkt og eru held ég búin að fyrirgefa mér allt stússeríið. Þau vita þá allavega hvert þau eiga að hringja ef þeim vantar greiða :)

Svo bara Spain tomorrow eða á eftir legg af stað eldsnemma í fyrramálið í lest og get ekki beðið eftir að hitta Bjarna minn. Vonandi verðum við heppin með veður, veitir ekki af smá lit þó það væri ekki nema smá roði í kinnarnar er orðin eins og vofa !

Þetta verður ekki nema 11. utanlandsferðin mín í ár, já og ég á ennþá 2 eftir áður en árið líður hressandi :)

Ég bið ykkur vel að lifa, hafið það gott, góða lærustrauma til allra sem þess þurfa og Gleðileg jól ef ég skrifa ekki aftur fyrir jólin.

luvBerglind

Rolling, rolling....

Frábær helgi :) Julefrokostið á laugardaginn heppnaðist alveg hreint æðislega, fengum góðan mat - ekki samt jólamat en súper góður og svo var partý langt fram á nótt. Ég lærði fullt af nýjum skemmtilegum partýleikjum, við fórum í singstar og ég og Hrabba tókum liðið í "það var lagið" leikinn, sama og við gerðum úti í Rúmeníu. Þær voru ekkert spes góðar í honum, ég get nú reyndar ekki sagt neitt er hrikaleg þegar kemur að lögum, EN nú detta allar dauðar lýs af ykkur þær þekktu ekki Pixies og lagið Hey, þær héldu að við værum að búa þetta til eða að þetta væri e-r hljómsveit frá Íslandi. Ég og Hrabba misstum andlitið og byrjuðum að syngja lagið fyrir þær og vorum vissar að þá myndi nú kveikna í e-rum sellum hjá þeim, en nei nei þær horfðu bara á okkur eins og við værum e-d skrítnar. En þar hafið þið það Pixies er ekki inn í DK, Noregi, Sviss, Hollandi né Ungverjalandi :)

Hápunktur kvöldsins var hins vegar þegar ég og Hrabba Turner tókum dansinn við Proud Mary lagið hennar Tinu Turner"and were rolling, rolling, rolling on the river" já spurning hvort þær líti sömu augum á mig eftir þennan svaka dans okkar. Því miður náðist dansinn ekki á filmu, en hann var rosalegur lofa því :) Spurning hvort Sigga Jóna taki mig ekki næst með sér í grúppíu þegar hún syngur lagið fyrir okkur valspíur :)

Ég gisti síðan hjá Hröbbu og fékk dýrindis morgunmat að venju hjá henni Hröbbu minni, skonsur og eggjasalat ummmmm, takk fyrir mig Hrabba og Viktor.

en nú þýðir ekkert að hanga uppí sófa og horfa á Despó, já nú þarf kellan að fara að gera e-d af viti því það styttist óðum í Spánarför og heimferð til Íslandsins góða. nóg að gera, alveg merkilegt mér fannst ég hafa nægan tíma meðan ég væri ein hérna í Danaveldi en tíminn er gjörsamlega búin að fljúga frá mér og núna eru bara 4 dagar þangað til ég fer.

Hafið það gott öll sömul og gangi ykkur vel hvort sem það er í próflestri eða jólaundirbúningi.

Hlakka til að hitta ykkur

luvBegga a.k.a dansing queen

Martröð

fékk martröð í nótt, eða mér fannst það martröð, mig dreymdi nefnilega að ég væri að fara í próf en væri ekkert búin að læra, ég varð svo stressuð og þurfti alveg smá tíma að átta mig þegar ég vaknaði, að ég væri nú búin með skólann og þyrfti ekki að hafa áhyggjur. Mjög eðlilegt, maður losnar ekki við prófstressið þó maður sé ekki einu sinni í skóla furðulegt :) Reyndar held ég að það sé bara ég sem er furðuleg en það er allt annar handleggur.

Búin að setja inn myndir frá Rúmeníu ferðinni, þær eru hérna vinstra megin fyrir ykkur sem hafið áhuga.

Annars er bara jólahlaðborð á morgun með Århus, hlakka ekkert smá til, held að þetta verði snilld eða vona það allavega.

Annars er bara lítið sem ekkert að frétta, bara 5 dagar í Spán og það verður æði :)

jiiiii er tóm, en þið gætuð kannski sagt mér eitthvað skemmtilegt

luvBerglind

er eðlilegt

að hafa þurft að strauja tölvuna mína 3 á einu ári og hún er bara árs gömul. Ég er meistari í að ná mér í einhverja fáranlega vírusa...arrggg hvað þetta getur verið pirrandi úffff. Sem betur fer var ég búin að taka copy af flestum myndunum mínum en það er mest svekkjandi í heimi að tapa öllum myndunum sínum sérstaklega þegar maður er ofvirkur á myndavélina eins og ég.

Ég er sko komin í jólaskap ætla á morgun til Århus að versla mér e-d jólaskraut. Er búin að setja upp eina seríu í gluggann, þannig að það er orðið smá jóló hjá mér. Þó að ég sé ein í kotinu verður nóg að gera hjá mér næstu daga, þrífa, skrifa jólakort, fara á jólahlaðborð með liðinu mínu, föndur og bökunardagur hjá Hröbbu og svo er náttla EM kvenna að byrja á morgun.

Já líf og fjör í baunalandi.

Ég er alltaf á leiðinni að skrifa ferðasöguna frá Rúmeníu hún kemur vonandi áður en árið er á enda.

sökum þess að commentakerfið mitt höndlar ekki álagið sem er við hverja færslu hef ég ákveðið að setja smá reglu en bara þið sem eruð í bleikum naríum megið commenta....

lifið heil

luvBegga

Home sweet home

Er komin heim í heiðardaglinn eftir ansi langt og strangt ferðalag frá Rúmeníu. Ferðasaga með myndum og fleira kemur seinna

Kellan er ein í kotinu þar sem Bjarni skellti sér til Íslands. Ég er nú í góðum höndum enda er Hrabba búin að lofa að passa mig voða vel, þannig að ég þarf engar áhyggjur að hafa :)

Annars var merkisdagur þann 25.nóv (reyndi að setja inn kveðju þá en að sjálfsögðu klikkaði bloggerinn) þar sem mín yndislega vinkona Anna átti afmæli. Anna er sko sú sem þraukaði með mér í gegnum hjúkkunámið og var svo "heppin" að vera með mér í hinum ýmsu verkefnum og svo lokaverkefninu!! Hún fékk ansi oft að heyra "hmmm heyrðu ég þarf að fara út í viku útaf boltanum" blabla en stúlkan fær sko þúsund plúsa í kladdann að hafa þolað mig og mitt vesen :) Ég hefði sko aldrei komist í gegnum námið án hennar.

Ég vona að þú hafir átt frábæran afmælisdag krúsí mín, ég hlakka endalaust til að hitta þig um jólin og fá að knúsa ykkur familíuna og sjá Kára sætasta - GET EKKI BEÐIÐ. Afmælisknús og kossar frá mér luvja. (Hérna til hægri eru Anna og Örvar og litli sæti Kári í mallakútnum :)

læt þetta duga í bili enda ansi þreytt kella sem kveður

luvBerglind

vitleysingurinn ég!!

Komin heim í snjóinn, það er fínt svo lengi sem ekki er geðveikt rok og ótrúlega kalt í leiðinni. Ég reyndar hef alltaf verið voða hrifinn af snjó hann lýsir svo upp þegar myrkrið er svona mikið, ég vona að það verði snjór um jólin.
Talandi um jólin þá er maðurinn við hliðiná okkur búinn að setja upp jólaljós. Yfirleitt hefur mér fundist þetta ALLT OF SNEMMT ekki einu sinni komin desember og mér finnst það reyndar að það mætti bíða fram í desember, en þar sem ég er ekki í prófum þessi jólin þá finnst mér þetta eiginlega bara dáldið skemmtilegt, en skil sko vel alla sem eru að fara að byrja í próflestri og prófum á næstu dögum að þá má helst ekkert jólalegt vera í kringum mann fyrr en maður hefur klárað prófin. Ég var allavega þannig að ég komst engan vegin í jólaskap fyrr en prófin voru búin.

en nóg um jólin...sufjan stevens er víst aðal málið í dag, eða það skynja ég allavega, ég verð þó bara að viðurkenna fávisku mína og segja "hver er það" ok ég er búin að kynna mér hann svoldið undanfarið, en vááá hvað ég er eftirá greinilega. Ég hef nú alltaf verið dáldið mikið eftir á hvað varðar tónlist og svona eða þannig séð, verður dáldið að mata mig með góðri tónlist. Ég vil nú samt líka kenna útvarpstöðvunum í DK um þetta því ég hlusta ansi mikið á þær og ALDREI hafa þær spilað tónlist eftir sufjan stevens. En hann er inn í dag og ég býð bara spennt eftir að heyra lögin frá honum.

jii þetta var hressandi blogg um ekki neitt nema fávisku mína
Ég er allavega heima á Íslandi þessa dagana í mömmumat og huggulegheitum
Hafið það gott
knúsBerglind

Hæ hó ég er að koma aftur !!!!

Fólk fer að fá leið á mér, bara alltaf á klakanum þessa stundina. Ég er búin að vera meira á Íslandi í nóvember en heima í DK, en það er bara gott og blessað því ég verð ekki mikið heima um jólin eða bara 5 daga. Jamm ég er semsagt að koma á mánudaginn og verð allavega fram á laugardag, hvert framhaldið verður eftir það kemur svo í ljós í vikunni.

Annars er bara allt fínt að frétta, gott að koma heim til Bjarna og líka að koma í góða veðrið sem er hérna. Hérna er ennþá 10 stiga hiti og Bjarni er ennþá að spila golf á sumarteigum eða grínum eða hvað þetta nú heitir. Hann er allavega rosa glaður með lífið og æfir sig óspart fyrir Spánarferðina okkar :) Jebb við ætlum að skella okkur í vikuferð til Spánar í des. Við erum bæði mjög spennt og verður gott að komast í smá frí því álagið er búið að vera svo mikið hérna ....hehe djóóókkkkk gætum ekki haft það náðugra :)

Bara spurning hvort ég verði komin með golf-bakteríuna eftir ferðina okkar - aldrei að vita!!

Helgin verður róleg enda leikur á sun hjá Bjarna, gríðarlega mikilvægur leikur eins og reyndar allir leikirnir það sem eftir er eiginlega !!!

setti inn myndir frá Íslandsförinni síðustu.

Meira var það ekki í bili

hafið það gott

knúsBegga

Ísland í máli og myndum

Erla og Lísa sætu í saumó
og þarna hinu megin er ég með Ísey krúsí sem er orðin 9 mánaða..váá hvað tíminn flýgur
Jæja ég skrapp til Íslands og var heima í 6 daga. Það var æði og auðvitað full dagskrá alla dagana. Ég nenni ekki að telja allt upp en mér tókst svona nokkurn vegin að gera flest sem mig langaði til nema að fara í sund, ég hefði eflaust frosið í hel ef ég hefði farið.

Jæja það koma nokkrar myndir úr ferðinni...enjoy...

Hérna eru tengdó (stolt amma og afi ) Elísabet og Adda.

Guðrún Drífa, Soffía, Hildigunnur og Gréta. Ég fór til Önnu pönnu á laugardagskvöldið og átti skemmtilegt kvöld með nokkrum valspíum.

Eva María og Begga í saumó og fyrir neðan Lilja, Heiður og Ágústa niðrí laugardalshöll eftir leikinn hjá stelpunum á laugardaginn.

Kristófer töffari er sko búinn að stækka :) váá hvað hann er orðinn stór strákur og svo mikið krútt. Hann er svo mikil dúlla gaf mér stubbaknús þegar ég kvaddi hann :)

Hérna er fallega Elísabet prinsessa og hetja. Það var alveg æðislegt að hitta hana og fjölskylduna hennar. Hún er algjört æði og ég gat ekki hætt að horfa á hana og dást að henni.


Familían mætti að sjálfsögðu til að segja Hæ við mig. Vantar reyndar helminginn á myndina en þau eru þarna e-rs staðar.





Hérna eru Hafrún, Arna, Lilja og Silla en við kíktum á kringlukránna í smá mat og tjatt










Ég náði að kíkja í saumó og fékk að smella mynd af elskunum mínum.


Svo er ég þarna fyrir neðan mynd af mér og Elísabetu æði, hún sofnaði bara hjá mér, algjört gull.






Svo að lokum Til hamingju elsku Martha og Heimir með prinsinn ykkar. Við hér í Silkeborg getum ekki beðið eftir að hitta ykkur og fá að sjá gullið ykkar.



Hafið það gott
LuvBerglind

óvænt óvænt óvænt

kellan mætt í óveðrið, hvað er að gerast með veðrið hérna á Íslandi, óveður og snjór, hálka, rok og rigning bara allar tegundir af veðri....en allavega ég er mætt til Íslands. Kom óvænt heim á fimmtudaginn en það munaði reyndar ekki miklu að ég hefði misst af fluginu þar sem þetta blessaða lestarkerfi í DK var alveg að fara að kostum. Þegar ég mætti til Skanderborgar til að taka lestina á Kastrup, var eins og vanalega strax komin seinkun 12 mín, ég bjóst nú alveg við því, en svo liðu þessar 12 mín en engin lest kom og þá byrjaði ballið, konan í hátalarakerfinu byrjar að tilkynna meiri seinkun og meiri og að lokum segir hún bara að ekki sé vitað hvenær eða bara hvort að lestin komi þar sem einhver motor vandamál eigi sér stað. Ég fer náttla í nett panik kast, yfirleitt ekki auðvelt að stressa mig upp (einmitt) en þarna kom smá stress. ÉG hringi í Bjarna og set hann í málið að kanna hvort ég geti tekið innanlandsflug eða í versta falli að taka flugið um kvöldið heim...í því
kemur önnur lest á svæðið sem er á leið til köben hún var notabene hálftíma of sein en ég ákvað að taka sénsinn og taka hana og vona það besta - þá var klukkan orðin 9.20 en ég ætlaði að taka lestina 8.15 semsagt klukkustund seinna er ég komin upp í lest, sem betur fer var þetta reyndar svona hraðlest, en allavega til að gera langa sögu stutta, er ég komin á hovedbanegarden kl.12.05 hleyp af stað með hlunkinn minn og í næstu lest og er komin á kastrup 12.30 til að innrita mig en vélin fór í loftið 13.20 mér semsagt tókst þetta vúhú og var ekkert smá glöð :)

Það er búið að vera æði að vera heima og mikið búið að gera.
Ég skrifa meira seinna
luv og Íslandskveðjur Begga

Fannst eins og ég hefði aldrei farið

Komin heim í heiðardalinn. Æði að hitta hann Bjarna minn aftur og notalegt að komast í sitt eigið rúm :)

Mótið í Hollandi gekk bara ágætlega svona í heildina, unnum 2 og töpuðum 3. Það var æði að hitta píurnar aftur og geta tjáð sig 100% og að sjálfsögðu aðallega að allir skildu hvað ég sagði:)

Það var geggjað að koma heim og hitta valspíurnar mínar, náði síðustu 15 mín af leiknum þeirra á móti Akureyri og gat því knúsað þær allar sveittar og æðislegar :) Ég hitti síðan skvísurnar um kvöldið og frábært að ná nokkrum klst með þeim. Ég náði líka að hitta hana Lísu mína, það var auðvitað æði þó stutt væri. Svo hitti ég alla familíuna mína nema systur mína sem stakk af til Glasgow og Bigga sem var á sjónum. Ég fékk að sjálfsögðu að stjórna matnum þessa 2 daga og fékk fisk báða dagana, já haldið kannski að ég sé skrítin en vááá hvað ég er búin að sakna þess að fá ýsu...ummmmmmmm.

Já ég náði að gera slatta á þessum 1 og 1/2 degi sem ég var heima, náði meira að segja að næla mér í einhverja magapest en hún gekk fljótt yfir sem betur fer.

Ég furðaði mig mest á því hvað mér fannst ekkert skrítið að koma heim, fannst bara eins og ég hefði skroppið í nokkra daga til útlanda, ekki mikið búið að breytast sem betur fer.

Annars ekkert nýtt, ekki nema þið hafið eitthvað til að segja mér

Hafið það gott

LuvBerglind

Ísland here I come

Jebbbbbbbbsí ég kem heim á morgun en fer reyndar aftur á þriðjudagsmorgun til Hollands en ég næ 1 og 1/2 degi heima og hlakka ekkert smá til. Verð með gamla íslenska númerið mitt heima og væri nú voðalega gaman að heyra allavega í ykkur því ég efast um að ég nái að hitta alla sem mig langar að hitta...

töpuðum á móti Randers áðan frekar fúlt þar sem við náðum að vinna upp 7 marka forskot þeirra en því miður náðum við ekki að landa stigum.

Benni og Jói eru mættir í hús, vorum að koma af Rib House þar sem Spareribs "all you can eat" pakki var tekinn. Metið er víst 3,5 kg, Heimir hefur nebbla farið með gestina sína þangað og metið hjá Baldvini er 3,5kg. Strákarnir voru held ég langt frá því, ég lagði nú ekki í þetta.

Ég veit ekki hvort ég bloggi eitthvað frá Hollandi efast um það því ég ætla mér að vera þar sem fjörið og sögurnar eru því hingað til hef ég verið með nefið ofan í bókum í þessum ferðum...EN nei ekki núna :)

Þangað til næst....Hafið það gott elskurnar mínar
luvBerglind

Hún á afmæli í dag

Yndis vinkona mín hún Sara á afmæli í dag :) Skvísan er 25.ára. Til lukku með daginn sæta mín, hafðu það súper gott krúslan mín og skemmtu þér svo rosalega vel á laugardaginn væri svoooo til í að koma en það verður að bíða betri tíma að við fögnum saman :) Knús og þúsund kossar lovja.

Annars bara líf og fjör í Silkeborginni.
Ýmsar breytingar í vændum hjá Bjarna mínum og liðinu hans.
Svo mæta 2 stuðboltar í hús á morgun ég hlakka mikið til og ég á eflaust eftir að hlæja alla helgina.
hafið það gott elskurnar
knúsarBerglind

Brostu þá mun lífið brosa við þér

Ef þið finnið enga ástæða til að brosa þá get ég lofað ykkur því að þið farið að skellihlæja þegar þið horfið á þetta http://www.youtube.com/watch?v=PPESam0yaOs allavega pottþétt brosið þið útí annað :)
Ég er búin að fá þetta sent 2 á emaili og hlæ alltaf jafn mikið. Þau eru svo mikil yndi þessi kríli.

Jæja eigið góðan dag varð bara að deila þessu með ykkur
hafið það gott
luvBerglind

Spurning um að kíkja í ræktina.

Þó ég hafi nú vaknað ágætlega hress í morgun eftir góðan nætursvefn þá átti það fljótt eftir að breytast. Ég byrjaði nú að gera það sem ég geri alltaf fyrst þegar ég vakna en það er að rölta inná baðherbergi og pissa og þurrka stírurnar úr augunum og svona þetta helsta. Ég ákvað síðan í sakleysi mínu að stíga á vigtina fyrst hún var nú svona beint fyrir framan mig og hvað... JÚJÚ hún sýndi 147,2 kg TAKK fyrir. Ég náttla hleyp og næ í gleraugun en engin vitleysa. Nú bíð ég bara spennt eftir að hinn búandinn á Drebbanum vakni til að láta hann stíga á vigtina. Ég ákvað meira að segja að taka mynd af þessu - tærnar voru að sjálfsögðu krepptar enda ekki nethæfar jeminn.

Já finnst ykkur mig vanta eitthvað til að gera hehehehe :) spurning um að fara að sækja um vinnu :)

luvBegga

Helgin, kompás og góðar fréttir.

Róleg en ljómandi góð helgi að baki, hún er búin að einkennast af þvílíkri leti, sjónvarpsglápi, þvo þvott og hafa það kósí með Bjarna. Það er nú alltaf rosa gott að taka svona helgar inná milli eða það finnst mér :)

Ég horfði einmitt á Kompás í gær þar sem verið var að ræða hversu auðvelt það er fyrir ungt fólk að nálgast fíkniefni á Íslandi. Það tók 16 ára tálbeitu Kompás einungis 20 mín að redda sér dópi !!! Svo voru tekin viðtöl við krakka (já ég kalla þetta krakka) sem voru á aldrinum 13 - 20 ára og ein af þeim var búin að vera edrú í 10 mánuði en hafði verið háð fíkniefnum í 5 ár, semsagt frá 14 ára aldri. Ég skil þetta ekki þegar ég var 12 - 14 ára gömul þá vissi ég varla hvað fíkniefni var, eða svona þannig séð, er virkilega allt búið að breytast svona ótrúlega mikið?http://veftivi.visir.is/veftivi/main.do?treeId=19002&progId=25532 hérna er kompás þátturinn ef þið hafið misst af þessu.

Við Bjarni erum síðan búin að vera að spá í að fara á námskeið hérna í Silkeborg. Bjarni ætlar að læra allt um digital myndavélar og allt um vinnslu á myndunum í tölvunni. ÉG hins vegar veit ekki alveg hvað mig langar að gera, en það er ýmislegt í boði t.d. Yoga, matargerð, nudd, dans, hljóðfæri og tungumál. Ég verð að finna mér e-d sniðugt.

Okkur bárust síðan góðar fréttir frá Boston í gær, en litla hetjan okkar er búin að vera svo dugleg. Við erum svo stolt af þeim öllum og okkur finnst þið vera algjörar hetjur elsku Adda, Fannar og Elísabet prinsessa. Við Bjarni erum svo spennt að komast heim til Íslands til að hitta þau að við hreinlega getum ekki beðið :)

Saknaðarkveðjur

Berglind

uppfært :) TIL HAMINGJU VALSSTELPUR með sigurinn á móti Haukum, frábært.

Áhugavert ....niiiii

Þið segið það!!! Já það er ekki mikið búið að gerast síðan ég skrifaði síðast, það markverðasta er líklega það að ég keyrði næstum á mink áðan. Gerði einmitt það sem ég átti ekki að gera og sveigði aðeins yfir á hina akreinina sem betur fer var enginn bíll þar. Maður á víst bara að bruna yfir þessi grey, ekki bremsa, ekki beygja, bara keyra.

Haustið er eiginlega komið hingað myndi ég segja. Ég er reyndar soddan kuldaskræfa að kannski er ekki að marka mig. Bjarna finnst ekkert kalt úti, en ég fór í vetrarúlpuna mína í gær.

Helgin verður bara róleg hjá okkur hjúum, leikur á sun hjá Bjarna. Þeir gerðu einmitt jafntefli í gær á móti Bröndby, gríðalega mikilvægt stig þar.

Við Århus píur gerðum hins vegar ekki jafn góða ferð til Horsens og töpuðum með 11.

Bráðum koma svo gestir til okkar en 2 félagar hans Bjarna ætla að koma hingað. Það verður eflaust hrikalega skemmtilegt enda dæmalaust hressir gaurar þar á ferð.

Ég vona nú að ég skrifi eitthvað mun áhugaverðara og skemmtilegra næst :)

Frábær helgi liðin

Helgin var æði í alla staði. Stelpurnar gjörsamlega versluðu frá sér allt vit :) og voru mjög sáttar við það. Það var ýmislegt brallað t.d. bakað, kjaftað, farið út að borða öll kvöldin, bíltúr, keila, þær skelltu sér í bíó, VERSLAÐ og ýmislegt fleira. Takk yndislegu frænkur fyrir mig og helgina.

Hér koma myndir frá helginni. Myndir segja meira en þúsund orð ekki satt.

Ég góð að láta gestina baka :) en sem betur fer því kökurnar voru rosalega góðar :) Hérna erum ég og Andrea með flottu keiluskóna.

(fyrir neðan)Við frænkurnar á Hard Rock í köben að gæða okkur á gómsætum burger.

Hérna eru skvísurnar að klára að pakka á bílastæðinu, já þær stóðu sig sko vel í búðarrápinu og voru í smá hættu á yfirvigt :) en það blessaðist allt saman. Frábær helgi með frábæru fólki.

Allar myndirnar eru komnar inná síðuna mína undir "Andrea og Rakel í heimsókn + dagur í köben".

Elsku sæta Elísabet prinsessa gangi þér vel á morgun, megi góður Guð vaka yfir þér og vernda litla prinsessa.

luvBerglind

25

já það er það víst orðið staðreynd ég er orðin 25.ára !!! Það er semsagt jafn mörg ár síðan ég var 20 ára og þangað til ég verð 30, já ég virðist bara verða klárari eftir því sem ég verð eldri, það eru ekki allir sem fatta þessa staðreynd :) :) Mér finnst ég nú samt ennþá vera 20.ára í anda (sumum finnst ég meira að segja líta út fyrir að vera 18.ára) t.d. verð ég alltaf jafn hissa þegar e-r segir mér kannski að einhver stelpa sem er 5 árum yngri en ég sé ólétt þá hugsa ég alltaf " í alvöru jii svona ung bara 15.ára :) heheh


Ég veit ekki hvort ég sé svona svakalega spennt en ég er allavega vöknuð fyrir allar aldir þrátt fyrir að hafa vaknað ótrúlega snemma í gær og verið að allann daginn í köben. Átti hreint út sagt frábæran dag í gær, hitti Árný og Ingibjörgu í lestinni í gær og af stað héldum við til köben til að hitta þær Lísu og Ísey :) JIII það var svo gaman að hitta þær. Ísey orðin svo stór og alltaf jafn mikil rúsína. Dagurinn var frábær, við fengum okkur að borða á frábærum samlokustað, röltum strikið, settumst á kaffihús og fengum okkur köku,kaffi og smoothís. Fórum að sjálfsögðu aðeins í HM :)
En ekki nóg með það að ég hafi hitt þær allar en þá komu mínar yndislegu frænkur alla leið frá Íslandinu í heimsókn til okkar. Ég náði í þær útá Kastrup og svo var bara brunað beint á strikið og það má segja að þær hafi farið hamförum þar :) Þær stóðu sig með eindæmum vel og þurftu sko enga hjálp frá mér :)
Við frænkurnar vorum síðan orðnar ansi lúnar eftir annasaman dag og enduðum þetta á Hard Rock fengum okkur að borða og svo beint í lestina til Skandeborgar.
FRÁBÆR DAGUR, takk Árný, Ingibjörg, Lísa og Ísey fyrir frábæran hitting og helgin er sko ekki búin hjá okkur frænkum og ég veit að hún á eftir að vera æðisleg.

Myndir frá Helginni koma seinna, skiljanlega þar sem hún er ekki búin hehehe:)
Begga 25 ára beib kveður
Hafið það gott
luv

Afhverju er ekki allt alveg eins og maður óskar

Unnum okkar fyrsta leik í deildinni í gær á móti Dagný og stöllum hennar í Holstebro. Við byrjuðum skelfilega og lentum 4 - 10 undir en staðan í hálfleik var 11 -13 í seinni hálfleik var eiginlega bara einstefna hjá okkur og lönduðum við 28 - 22 sigri.

Annars er hugur okkar á Íslandi þessa dagana. Sendum allann okkar styrk, alla okkar orku og allar okkar jákvæðu og góðu hugsanir þangað. Megi Guð vera með ykkur Elsku Aðalbjörg, Fannar og Elísabet prinsessa.

luvBerglind

milli svefns og vöku

Hafið þið lent í því að leggja ykkur og eftir einhvern tíma teljið þið að þið séuð vöknuð... en raunin er að maður er bara ekkert vaknaður heldur svona á milli svefns og vöku, maður veit hvar maður er, heyrir kannski í umhverfishljóðum í kringum sig EN getur sig hvergi hreyft og ekki vaknað almennilega....úfff lenti í þessu áðan og þetta er svo óþægilegt, ég fann alveg hvernig hjartað fór á þúsund og ég fór að anda hraðar og ég hugsaði meira að segja róleg, slakaðu á þú vaknar eftir smá stund. Ég reyndi að hreyfa hendurnar, fæturnar, reyndi meira að segja að láta mig detta fram úr sófanum EN nei nei ég var bara lömuð....en sem betur fer vaknaði ég, sko svona alvöru vakandi, stuttu seinna...Þetta er ótrúlega skrítið og ekki fyrsta skipti sem ég lendi í þessu furðulegt

Styttist óðum í köbenferð, frænkuheimsókn og að kellan verði árinu eldri...já aldeilis spennandi tímar framundan. Fékk einmitt afmælispakka sendan frá m&p og mamma er spenntari en ég, spurði strax ertu búin að opna hann...ég ætla nú að reyna að þrauka fram að afmælisdeginum og opna hann þá :)

jæja þangað til næst

Hafið það gott öll sömul

luvBegga

Haustið komið

eða svona eiginlega, það varð bara kalt 1,2 og bingó. Maður verður bara að taka því, enda sumarið búið að vera frábært og einhvern tíma varð haustið að koma....

en að öðru við spiluðum á móti Slagelse DT á föstudaginn. Anja Andersen þjálfar slagelse og er þetta lið stjörnum prítt. Við töpuðum 30 - 22, þetta var svona OK leikur hjá okkur, aðeins of mikið að tæknifeilum sem er afar slæmt að gera á móti jafn sterku liði og Slagelse. Gellurnar í slagelse byrjuðu frá fyrstu mínútu að skora fyrir aftan bak, gera sirkus mark og markmaðurinn hjá þeim "toppaði" þetta með því að standa á haus í víti...já og það gerði hún á 10 mín eða eitthvað....ÆJJJJ mér fannst tímasetningin frekar skrítin, en Hrabba skoraði úr vítinu, ég hefði nú örugglega bara frosið og skotið beint í markmanninn, kannski að maður ætti að fara að æfa þetta - hlýtur að vera svaka sniðugt fyrst besti markmaður í heimi gerir þetta !!!!! held samt ekki fimleikar hafa aldrei verið mín sterka hlið...

Ég fékk að spila í leiknum og það alveg slatta einhverjar 40 mín held ég, ég stóð mig OK, en þetta er allavega byrjunin, svo er það bara þolinmæði...

Við komum síðan seint heim eftir leikinn þannig að ég fékk að gista hjá Hröbbu í nýja flotta húsinu þeirra, ekkert smá glæsilegt. Við höfðum það síðan kósí á laugardaginn, Hrabba bakaði skonsur, fórum í Bazar vest sem er svona markaður með allskonar dóti og geðveikum ávaxtamarkaði og síðan var ég tekin í kennslustund í fótboltaspili usss, Viktoría og Hrabba rúlluðu mér upp.

Ég hef nú ekki góðar minningar af svona fótboltaspili (þetta er svona spil með köllum á stöng æjjj þið vitið svona handföng sem maður snýr köllunum í hringi!!) einu sinni fórum, ég, Elfa, Anna, Kolla og Árný niðrí bæ og á einhvern skemmtistað og einmitt í svona fótboltaspil og við byrjum að spila á móti einhverjum gaurum og leggjum einn bjór undir, að lokum vorum við semsagt búnar að tapa nokkrum sinnum og ákváðum að borga þeim einn (eða Elfa gerði það nú) og síðan bara koma okkur út....EN NEI NEI gaurinn hélt nú ekki, reif í mig alveg brjálaður og sagði að ég/við skulduðum þeim fleiri drykki, kellan með sína vöðva (einmitt) reif sig burt og ætlaði að fara af stað niður stigann, lít upp og þá bara skvasssss kjellinn hellti yfir mig bjórnum, sem Elfa gaf honum btw....djöfull var ég fyrst pirruð en svo bara í sjokki og fór heim til hans Bjarna míns - já það er klikkað þetta lið og allt útaf einu fótboltaspili.... usssssssss

Annars verður restin af helginni bara róleg, enda verður sú næsta alveg súper æðisleg, ég fæ nefnilega heimsókn hingað til Silkeborgar JIBBÍ fyrsta gistiheimsóknin frá Íslandi, mamma og pabbi komu náttla en þau gistu á hóteli, en frænkur mínar þær Andrea og Rakel ætla að fara á vit ævintýranna og kíkja í heimsókn til frænku, við ætlum að hittast í köben, þar sem ég verð einmitt að knúsa Lísu og Ísey og eyða deginum þar og síðan brunum við til Silkeborgar og gerum eitthvað fullt skemmtilegt :)

Jiii en spennandi

Hafið það gott

luvBerglind

p.s valsstúlkur til hamingju með sigurinn á móti Stjörnunni og HK - komnar á beinu brautina keep up the good work

Já hvað þarf maður meira...

en góðan nætursvefn til að verða svona eldhress og tilbúin í eitt stykki blogg :) Já letin kom og fór sem betur fer og hressleikinn með eindæmum mikill í dag...
Ég og Bjarni ákváðum, þar sem við vöknuðum svo snemma, að taka smá túristaleik í dag og keyrðum stóran hring í nágrannabæi. Þetta var alveg ágætt við erum allavega búin að finna út hvert við förum EKKI með þá sem koma í heimsókn :)


Var að horfa á Oprah áðan ( já er gjörsamlega dottinn í pakkann...) og þar var Pink í heimsókn og var verið að ræða lagið "Stupid girl" og myndbandið við það lag. Mér finnst þetta myndband algjör snilld... Hafið þið séð þetta myndband? Hún þorir allavega að segja eitthvað um þetta!!!



Núna eru bara 10 dagar þangað til ég hitti hana Lísu mína og Ísey .... Ég og Árný ætlum að fara stelpuferð til köben og hitta þær stöllur, það verður náttla æði og líður mér bara eins og barni á jólunum:) Þessa mynd tók ég af Ísey bara rétt áður en ég fór út og er hún sko ansi mikið búin að stækka síðan þá skvísan :)


Já og svo fer að koma að því að kellan verði árinu eldri, efast um að ég haldi partý því til heiðurs en þó aldrei að vita nema maður haldi eitthvað smá, kannski bara kaffiboð hæfir það ekki svona þegar maður er orðin svona stór hehehe. Það er allavega nóg af fólki sem maður getur boðið það eru íslendingar út um allt :) Mér finnst ekkert gaman lengur að eldast það er alltof stutt í þrítugs afmælið úfffff tíminn líður bara hraðar og hraðar eftir því sem maður verður eldri - skil bara ekkert í þessu...

Svo ætlum ég og Bjarni að bjóða í mat í kvöld, það verða semsagt ÉG og 4 strákar, held einhvern vegin að ég verði ekki mikið inní umræðuefninu í kvöld, ég mun þó reyna hvað ég get að skjóta inn einhverju skemmtilegu t.d. sáuð þið melrose jiii svo spennandi - reyndar gæti Heimir fylgt mér eftir í því hann virðist laumast í þættina, komst upp um hann um daginn þegar ég var eitthvað að horfa á melrose og Heimir vissi meira um þetta en ég...hehehe

jæja eigum við ekki að segja þetta gott í bili
Hafið það gott elskurnar og ekki vera feimin að commenta ég bít ekki - LOFA
LuvBerglind

p.s Heimir spiluðuð þið ekki bara 17 holur telur það þá !!!!!

Það er alveg..

fullt búið að gerast og margt að fara að gerast, en því miður nenni ég engann veginn að skrifa um það, einhver leti sem er að tröllríða íbúum á drebbanum, eða allavega öðrum, hvernig er hægt að vera svona... maður bara spyr sig.

annars bara hress og skrifa ennþá meira þegar ég verð orðin eiturhress...

luvBerglind

Ergilegt....

Við töpuðum á móti FCK, ég fékk minn séns en náði ekki að nýta hann - frekar fúlt en það þýðir ekkert að grenja það bara bretta upp ermar, spýta í lófana og vera ready næst- ekki satt!!!

Þessi ferð til köben var samt alls ekki leiðinleg þar sem Sigrún sæta kom á leikinn og var frábært að hitta hana :) Við náðum að spjalla aðeins áður en ég þurfti að leggja af stað, en við vorum komnar heim kl.2.30 í nótt og þá átti ég eftir að keyra til Silkeborgar, en sem betur fer kom Bjarni og sótti mig.

Annars er það að frétta að ég lét loksins verða af því að kaupa mér nýjan síma og sá sem varð fyrir valinu var ódýr en rosalega flottur sími, ég er rosa ánægð með hann og loksins verð ég þá komin með síma sem hringir :) EN ég fékk líka nýtt símanúmer þannig að bráðum verður gamla númerið mitt óvirkt og því fer hver að verða síðastur að biðja um númerið :) http://www.lge.com/products/model/enlarge/kg800.jhtml hér er tólið.

Svo fer að líða að því að við fáum heimsókn....LOKSINS...alltof langt síðan einhver kíkti til okkar, en mamma hans Bjarna og bróðir hans ætla að koma hingað 20.okt og vera í viku það verður frábært að fá þau.

Svo er Lísa mín að fara að heimsækja mömmu sína til Svíþjóðar og ætlum við að hittast í Köben í einn dag og verður það alveg yndislegt að hitta hana og auðvitað Ísey mína og fá að knúsa þær aðeins og babbla við þær "live" :)

Eitt af því sem er erfitt við að búa í útlöndum er að missa af litlu krílunum sem vinkonur mínar eiga, þau stækka svo rosalega hratt þessar dúllur að áður en maður veit af eru þau byrjuð í skóla !!!

jæja farin að gera eitthvað af viti

hafið það gott

luvberglind

Stutttttt í þetta skiptið

Hæ hæ stutt í þetta skiptið. Við kepptum leik á móti Ikast síðasta sunnudag, töpuðum með einu marki því miður, spiluðum fínan leik en smá meiri einbeiting í lokin og skynsamara spil þá hefðum við unnið leikinn. Ég kom inná í einu víti en tókst ekki að verða fyrir því. Bjarni og félagar gerðu hins vegar jafntefli á móti Randers og voru þeir ánægðir með það.

Það er svo leikur aftur á morgun hjá okkur Århus píum á móti FCK þannig að það er skemmtilegt ferðalag í vændum - en þá kemur ferða DVD spilarinn að góðum notum :)

Áfram Valur í kvöld - hugsa til ykkar stelpur og sendi góða strauma.

Ég, Bjarni og Heimir sitjum hérna að horfa á Americas next top model JÁ það er girl power í gangi þið sjáið hver ræður fjarstýringunni hér.....Niiii reyndar ekki alveg þeir eru 2 á móti mér einni og við skiptum yfir á fússara eftir smá :) :)

Fleiri fréttir seinna

Hafið það gott

Beggan kveður.......

Gekk í barndóm

já það má búast við að Bjarni verði svona alla helgina það er nefnilega Ryder keppnin í golfi í sjónvarpinu :) Já já en ég náði nú samt að draga hann út í gær og við ákváðum að fara í svona dýragarð sem maður keyrir í gegnum á bílnum sínum, þannig að dýrin eru bara alveg upp við bílana. Það var ótrúlega gaman að fara þarna og við gengum bara í barndóm aftur. Það voru nánast öll dýr að finna þarna. Stundum þarf maður að fara út úr bílnum og ganga til að sjá ákveðin dýr eins og górillur, apa og svoleiðis, en maður keyrir meðfram, gíröfum, buffalóum og fullt af öðrum dýrum. Svo er sérstakt svæði með ljónum og að sjálfsögðu keyrðum við þar í gegn og karla ljónið var alveg við hliðina á okkur labbaði fyrir framan bílinn okkar og alles - úff ég var nú bara pínku hrædd :) En þetta var þræl gaman og þarf ekki að pína mig að fara þarna aftur þegar öll "börnin" koma í heimsókn hehehe

Á fimmtudaginn héldum við síðan okkar fyrsta danska matarboð þ.e. við buðum dönsku pari í mat og hvað haldið þið jú jú við töluðum bara dönsku reyndar eru þau extra dugleg að hlusta og reyna að skilja þannig að þetta gekk ágætlega, reyndar ekkert spes orðaforði sem ég er með og hreimurinn náttla ÍSLENSKUR hehe en þetta kemur hægt og rólega.

Síðan er leikur á morgun á móti Ikast og vonum við það besta í þeim leik. Liðið okkar er hreinlega að hrynja niður það meiðist bara hver á fætur annarri, ein með slitin krossbönd, brotinn ökkla, tognuð á ökkla, meidd á hendi, ein í leikbanni og ég veit ekki hvað og hvað. Ég fer að taka fram stuttbuxurnar og mæta sem skytta á næstu æfingu :) aldrei að vita...

Annars er bara allt það sama að frétta, það er ennþá massa gott veður hérna allavega miðað við að það er kominn 23.september, ég er ennþá bara í hlýrabol úti ljúft....

Hafið það súper gott

Begga monkey kveður

luv

p.s setti inn nýjar myndir á myndasíðuna mína heitir Dýragarður og fleira :) tjekkitát hérna niðri hægra megin :)

4 stig á drebbann

Langar að byrja á að óska minni yndislegu bestu systur í heimi til hamingju með afmælið. Hún átti afmæli í gær skvísan og auðvitað alltaf jafn ungleg :) Hérna eru ég og hún á leið í Óvissuferð með Val í fyrra, hún var í kvennanefndinni, ég með "melludólgahattinn" eins og öllum fannst hehehe
Svo átti Stebbi hennar Sillu líka afmæli í gær, til lukku með það Stebbi minn - greinilega bara úrvalsfólk sem á afmæli 17.sept :)

Helgin er hins vegar búin að vera Æðisleg hérna í Danmörkunni. Við byrjuðum á að fara í fótboltagolf á fimmtudaginn og það var rosa stuð :) Þetta er nákvæmlega eins og golf nema maður notar fótbolta og fæturna að sjálfsögðu :)(segir sig nú kannski sjálft hehe) þetta var 18 holu völlur með allskonar brautum og mismunandi hindranir á hverri og einni. Bjarni var nú farin að stórefast um fótboltahæfileika mína og spurði mig ansi oft "bíddu æfðirðu ekki fótbolta" fusssss hann átti nú nokkur skrautleg "högg"/"spörk" og hann er atvinnumaður í FÓTBOLTA :) hehe

Síðan ákvað ég að bruna til Fredericia í smá heimsókn til Árný og Fannars. Ég stoppaði reyndar stutt, en fór á leik með Fannari - það var stuð og mikil stemming í höllinni. Árný og Fannar eru búin að koma sér ekkert smá vel fyrir og eru bara í klst fjarlægð frá okkur þannig að maður er enga stund að bruna til þeirra :)

Svo lá leiðin á Vejle völlinn en Bjarni og félagar kepptu á móti Vejle á laugardaginn og þeir UNNU víííí 4 -2 og Bjarni var góður. Það var auðvitað þungu fargi af þeim létt og þessu fagnað um kvöldið. Ég var hins vegar bara heima þar sem ég var að keppa í gær á móti GOG og við gerðum jafntefli :) Þannig að þetta var aldeilis frábær helgi fyrstu stig okkar Århus pía og gríðarlega mikilvægur sigur hjá Silkeborgar-mönnum.

Svo var ég vakin í morgun með frábærum hætti :) Pakki frá mömmu og pabba. Takk elsku mamma og pabbi þið eruð best.

Saknaðarkveðjur

luvBerglind

Skotárás í Silkeborg

og það 800 metra frá okkur....já það gerist greinilega allt í Silkeborginni, það var semsagt skotið 6 - 9 skotum inn á löggustöðina hérna í Silkeborg á aðfaranótt miðvikudags, sem betur fer slasaðist enginn, skotin fóru inn um rúðu og enduðu í veggjum hér og þar á löggustöðinni. Það hefur ekki enn þá náðst til þessara vitleysinga en ég vona svo sannarlega að löggan finni þá.

Annars mætti bara halda að sumarið væri komið aftur, það er ekki eðlilegt að vera bara á hlýrabol og pilsi 13.september....en jú jú og ekki kvarta ég, ekkert smá notalegt að hafa svona gott veður og vona ég að það verði gott haust og góður vetur í ár :)

Hvet síðan alla til að kíkja á kastljósið í gær http://dagskra.ruv.is/streaming/sjonvarpid/?file=4298215 ef þetta er ekki forvörn fyrir alla sem hafa bílpróf og sérstaklega alla þá sem halda að það sé hipp og cool að keyra hratt þá veit ég ekki hvað. Segi eins og foreldrar þessa drengs sem fjallað var um í kastljósi í gær, látið ykkur þetta að kenningu verða, ekki hugsa "þetta kemur ekki fyrir mig" því þetta getur vel komið fyrir þig/mig + að við leggjum alla aðra í kringum okkur í hættu með svona fáranlegum akstri.

Ég hef það oft á tilfinningunni sérstaklega heima á Íslandi að þegar maður keyrir á löglegum hraða þá séu allir í kringum mann pirraðir því maður keyrir svo "hægt" ég segi nú bara leggið 5 mín fyrr af stað :)

jæja forvarnar Begga kveður

luv

2 töp, 2 vondar kökur usss

jammogjæja við töpuðum leiknum á móti Esbjerg 29 - 22, alls ekki nógu góð úrslit. Kellan spilaði ekkert. Það er talað um leikinn á þessari síðu http://www.skaarhus.dk/ Við hefðum átt að vinna þennan leik að mínu mati, þegar um 7 - 8 mín voru eftir var staðan 21 - 20 fyrir Esbjerg...

Sunnudagurinn var öllu skemmtilegri (svona að mestu leiti) Dagný, Gunnar Berg og moli litli komu í heimsókn til okkar. Hrabba, Viktor, Hanna, Valný og Biggi komu líka, ætlunin var að fara á leikinn hjá Bjarna og vera HAPPA. Við fórum á leikinn - en við vorum ekki happa :( Bjarni og co töpuðu leiknum 2 - 0, dííí ekki gott.

En heimsóknin var skemmtileg, moli litli var látinn í æfingabúðir :) hann þurfti að æfa sig að labba og gekk vel sló metið :) komin held ég 7 skref - já hann er sko lang flottastur.

Ég ætlaði nú að sýna gestunum að kellan gæti nú verið smá húsmóðir...bakaði 2 kökur og hvað haldið þið júúú þær voru BÁÐAR VONDAR, djöööö - alltof þurrar og harðar, Viktor var nú kurteis og fékk sér eina sneið haha - hann er líka með sterka kjálka drengurinn.

Við slúttuðum síðan kvöldinu með Pizzu, sem rann sko ljúflega niður :)

Hérna eru síðan sætu "litlu" frænkur mínar :) já ég segi ennþá litlu frænkur en þær eru ekkert litlar lengur - orðnar jafnstórar og ég :) og sko orðnar 17. ára skvísurnar. Rakel átti afmæli 25.ágúst og Andrea á afmæli á morgun - semsagt báðar 17.ára (næstum) komnar á kagga og læti. Keyrið varlega elskurnar :)

Mamma fékk smá sjokk um daginn þegar Systir mín gerði henni grein fyrir að hún gæti bráðum orðið langamma :) hehe mamma bara jiiiii heldurðu að þær eignist barn á undan Berglindi - jaaaa mamma það gæti nú bara orðið svo :) kellan er ekki alveg í barnahugleiðingum núna. Þetta er nú samt orðið dáldið öfugsnúið það voru nú þær sem áttu að passa börnin mín en gæti allt eins orðið að ég passi þeirra. Nei held samt ekki þær eru ennþá svo ungar þessar skvísur. Ég sakna allra heima ofsa mikið, það var nefnilega afmælisveisla á laugardaginn en þá átti Hans Viktor afmæli og bráðum á Helga Kamilla afmæli eða 16.sept.

Já systkini mín voru voða sniðug og eignuðust börn nánast á sama tíma ALLTAF. Frekar fyndið það eru 18 dagar á milli elstu, 5 mánuðir á milli mið og 7 dagar á milli yngstu :) þannig að það er alltaf fjör þegar familían hittist enda alltaf einhver til að leika við eða spjalla við á sama aldri :)

Þau eru svo mikið æði, mamma og pabbi keyptu handa þeim búning svona eins og Bjarni spilar í og gáfu þeim þau eru náttla æði í búningnum...sakna ykkar krúslurnar mínar.

Elma Dögg og Steinunn Lind þið komið seinna ;) fáið alveg spes blogg, sakna ykkar rosa mikið luvBerglind

nóg í bili og segið nú hæ ef þið lesið bloggið :)

luvBerglind eða Berglund eins og Danir virðast halda að ég heiti ;)

Danmörk 2 - Ísland 0

Það hefði verið gaman að vera Íslendingur í Danmörku...já ef þeir hefðu nú bara getað eitthvað í leiknum í gær....Ég var meira að segja búin að ákveða að mæta í Íslands treyju á æfingu í dag og monta mig aðeins :) en niiii ekkert verður af því, ekkert spes leikur hjá þeim í gær..

Næsti leikur hjá mér er á laugardaginn á móti Esbjerg og næsti leikur hjá Bjarna er á sun á móti FCM Midjylland og vonumst við að sjálfsögðu eftir sigri í báðum þessum leikjum. Gott fyrir okkur að rífa okkur upp eftir slæmt tap í fyrsta leiknum og já Bjarni og þeir þurfa bara nauðsynlega á stigum að halda. Ég kemst á leikinn og vonandi verð ég happa :)

Mál málanna á Íslandi þessa dagana er svo hann Magni - eða það hefur maður heyrt allavega, ég hef ekkert fylgst með þessu, fer reyndar stundum inná rockstar.msn.com en ég get aldrei séð dómana - en Magni er samt greinilega að standa sig rosa vel, ef þið getið bent mér á einhverjar síður þar sem maður getur séð þetta allt saman þ.e. líka dómana þá endilega láta mig vita.

Síðan setti ég inn myndir frá Ágúst mánuði hérna í DK, myndir frá því mamma og pabbi voru hérna í heimsókn, þegar Árný og Fannar kíktu til okkar og svo bara svona hitt og þetta - kíkið á það.

Hafið það gott

luvBerglind

Sunnudagur til sælu

Fyrsti leikurinn okkar í deildinni var spilaður í gær á móti Álaborg og ekki riðum við feitum hesti í þeirri viðureign = við skíttöpuðum, Álaborg var bara 2 klössum betri en við á öllum vígstöðum. Ég spilaði síðustu 10 mín, kom inná í stöðunni 16 - 30 (stuð), en ég fékk allavega smá tíma, sem er nú bara gaman :)

Stemmingin var semsagt ekkert rosalega í gær og ég og Bjarni ákváðum bara að bruna til Silkeborgar og hugga okkur heima :) Ætluðum að vera í Århus að kíkja aðeins á næturlífið með Árný, Fannari, Stulla og Möttu, en nenntum því ekki - algjörir lúðar en við bættum það aðeins upp og kíktum aðeins downtown Silkeborg um kvöldið - já ég veit við erum svo crazy. Við tókum semsagt smá spil hérna heima, Bjarni kenndi mér póker og pókersvipurinn minn er greinilega svaka góður össss því ég rústaði Bjarna :) hann er greinilega svona svakalega heppinn í ástum strákurinn. Reyndar getur verið að þetta hafi verið svona byrjendaheppni eða neiiiiiii held ekki.

Dagurinn í dag verður svo bara notaður í afslöppun, já ég ákvað að breyta aðeins til og hafa það kósí heima :)

Svooo að allt öðru en ég hef alltaf talið mig vera svona frekar hávaxna (er 1,75) var t.d. með þeim stærstu í Val og allavega ekki með þeim minnstu í landsliðinu, en hérna úti er ég kölluð LITLI ÍSLENDINGURINN haaaaaaaaaa, jájá maður er alltaf að heyra eitthvað nýtt :) Ég hefði nú aldrei trúað því að ég færi að nota málsháttinn "margur er knár þótt hann sé smár" en ég þarf greinilega eitthvað að fara að endurskoða það :) hehe

Begga litla kveður, hafið það gott
luv

Umekkineitt

Sæl verið þið :) Skólarnir eru byrjaðir á fullu og það er ansi skrítin tilfinning að þurfa ekki að setjast á skólabekk hmmm, ég eiginlega sakna þess dáldið, en það verður eflaust ENGINN söknuður um jólin þegar prófin fara af stað, ég hef aldrei verið sú hressasta á þeim tíma :) Sá sem fagnar þó eflaust mest að ég sé ekki að fara í skóla er hann Bjarni minn, jeminn það sem drengurinn hefur þurft að þola undanfarin 4 ár obbbosí segi ég nú bara, ég náttla missi mig bara svona rétt fyrir prófin - en nóg um það sú tíð er liðin allavega í bili.

Ákvað síðan að setja inn myndir síðan skötuhjúin þau Árný og Fannar komu í heimsókn til okkar, það var auðvitað æði.

Við erum loksins búin að fá okkur heimasíma JIBBÍ. Það eru víst alltaf einhver tilboð hjá símafyrirtækjunum varðandi það að hringja til útlanda og um að gera að nýta sér það elskurnar mínar því það væri æði að heyra í ykkur :) :)

Voðalega er ég eitthvað tóm núna...læt þetta því bara duga í bili

Elskið friðinn og strjúkið kviðinn

Hafið það gott luvBegga